PROGRAMA DE ACTIVIDADES DO MES DE XUÑO NA CASA XOHANA TORRES

• Xoves 4 de xuño - 19:30 a 21:30 - ASEMBLEA aberta, promovida por AVANTE LGBT+.

• Martes 9 de xuño - 18:00 a 20:00 - OBRADOIRO "Autodefensa feminista para todes", con Cristy Tojo, instrutora de artes marciais, directora do Club Deportivo Avalon Kai e campioa de Europa de Parakarate. Segunda edición deste obradoiro de autodefensa feminista cunha perspectiva interseccional e LGTBIQ+, orientado a traballar ferramentas de autocoñecemento, detección de situacións de risco, comunicación de límites e estratexias físicas básicas de protección. A repetición da actividade responde á alta demanda de participación.

• Martes 16 de xuño - 19:00 a 21:00 - OBRADOIRO "Esta noite cruzamos o Mississippi: Historia da representación da identidade trans no mundo audiovisual e lexislativo", con Cinthia Ermitas, educadora social especializada en diversidade sexual e de xénero, pedagoxías críticas e intervención socioeducativa desde unha perspectiva feminista e interseccional. Obradoiro de reflexión crítica sobre a historia das identidades trans no contexto español, no que se abordará a evolución dos seus dereitos e da súa representación no cine e na televisión ao longo das últimas décadas. A actividade combinará materiais audiovisuais, debate e reflexión colectiva arredor da memoria e das narrativas sobre as identidades trans.

• Xoves 18 de xuño - 19:30 a 21:30 - ASEMBLEA aberta, promovida por AVANTE LGBT+.

• Venres 26 de xuño - 19:00 a 21:00 - CLUB DE BORDADO II "Bordando o pasado" con María Arufe, educadora artística e creadora audiovisual especializada en proxectos con perspectiva de xénero e enfoque interseccional. Última sesión do segundo grupo do Club de Bordado da Casa Xohana Torres, un espazo de creación colectiva no que se mesturan técnicas básicas de bordado coa intervención manual de fotografías e postais antigas de mulleres para repensar, desde o fío e a conversa, a memoria persoal e colectiva. Grupo pechado, polo que non se aceptan novas inscricións.

• Martes 30 de xuño - 18:30 a 21:00 - OBRADOIRO "Construíndo a nosa personaxe drag (iniciación)" con Abi Gracia, formade en filosofía, fotografía e audiovisual, especializade en diversidade sexual e de xénero e con experiencia en maquillaxe artística e creación drag. Obradoiro práctico de iniciación ao drag centrado na creación dunha personaxe propia a través da caracterización, a estética e a performance. A actividade propón achegarse ao drag desde unha perspectiva creativa, colectiva e accesible, explorando a expresión artística e os códigos asociados ao xénero nun espazo seguro e de experimentación, con maior presenza de referentes drag king e perspectivas non binarias.

Se queres inscribirte nalgunha destas actividades, cubre o seguinte formulario:

O tratamento dos datos de carácter persoal que se facilitan voluntariamente no formulario para a INSCRICIÓN EN ACTIVIDADES DA CASA XOHANA TORRES suxeitarase ao establecido na Lei Orgánica 3/2018, de 5 de decembro, de Protección de Datos de Carácter Persoal e demais normativa de aplicación. Os datos persoais solicitados serán tratados coas medidas de seguridade necesarias de acordo co previsto no artigo 9 da Lei Orgánica 3/2018, de 5 de decembro, de Protección de Datos de Carácter Persoal e o Título VIII do Real Decreto 1720/2007, de 21 de decembro.

Así mesmo, garantirase a confidencialidade dos datos e non se comunicarán a terceiros fóra dos casos necesarios para xestionar os servizos proporcionados, así como os previstos na normativa vixente, non podéndose utilizar, en ningún caso, para fins comerciais. Calquera persoa poderá exercer en calquera momento o seu dereito de acceso, rectificación, cancelación e oposición sobre os seus datos persoais, na forma legalmente prevista, presentando unha solicitude no Rexistro Xeral do Concello, segundo o previsto na Lei 39/2015, do 1 de outubro, de procedemento administrativo común das administracións públicas (a oficina principal do Rexistro Xeral atópase en Presidente Salvador Allende 4 baixo, 15705, Santiago de Compostela).

Moitas grazas por cumprimentar o FORMULARIO DE INSCRICIÓN.

Preme "Enviar" para rematar.