7 Dae- Vind jou identiteit in Jesus

7 Dae- Vind jou identiteit in Jesus

Welkom Liewe vrou, by hierdie 7-dae reis. 

As jy al ooit gewonder het wie jy regtig is, of jy genoeg is, of God jou nog sien, dan is hierdie reeks vir jou.

Die wêreld probeer dikwels vir ons sê wie ons behoort te wees, maar God se Woord vertel 'n ander storie. Jou ware identiteit word nie bepaal deur jou verlede, jou foute of ander mense se opinies nie. Jou identiteit word gevind in Jesus Christus.

Ek bid dat hierdie volgende sewe dae jou sal help om God se waarheid oor jou lewe te ontdek, jou geloof te versterk en jou hart nader aan Hom te bring.

Mag jy aan die einde van hierdie 7-dae reis met oortuiging kan sê:

 "Ek weet wie ek is, want ek behoort aan Jesus." 

Vrou van God, ek wil jou aanmoedig om elke dag se uitdaging met oop hart aan te pak. Neem tyd om die Bybelverse te lees, beantwoord die selfrefleksievrae eerlik, Spreek Jesus se woorde oor jouself. Hoe meer jy betrokke raak by hierdie reis, hoe meer ruimte gee jy vir God om jou hart te vorm en jou te herinner aan wie jy werklik in Hom is.

Ek bid ook dat hierdie volgende sewe dae jou geloof sal versterk, jou hart sal bemoedig en jou sal help om jou ware identiteit in Jesus te ontdek.

Kom ons begin hierdie reis saam.

Om jou identiteit in Christus te verstaan, is nie net belangrik nie dit is noodsaaklik. 

Van die begin af was die vyand se grootste strategie om die mens te mislei oor wie God is én oor wie ons is. In die tuin van Eden het hy nie net God se Woord bevraagteken nie, maar ook Eva se vertroue in haar Skepper. Hy wou haar laat glo dat wat God reeds gegee het, nie genoeg was nie.

Vandag gebruik hy steeds dieselfde strategie. As hy jou nie van Jesus kan weghou nie, sal hy probeer keer dat jy verstaan wie jy in Jesus is. Want 'n Christen wat nie sy of haar identiteit ken nie, leef maklik in vrees, skuld, skaamte, verwerping en die voortdurende behoefte om goed genoeg te wees. So iemand word maklik deur leuens, omstandighede en ander mense se opinies rondgeslinger.

Maar wanneer God jou oë oopmaak vir wie jy in Christus is, verloor baie van die vyand se leuens hulle krag. Jy besef jy is nie meer 'n slaaf van sonde nie, maar 'n kind van God. Jy hoef nie meer God se liefde te verdien nie, want jy is reeds aanvaar deur Jesus Christus.

Daarom is identiteit in Christus nie net 'n mooi Bybelstudie nie—dit is geestelike oorlogvoering. Die vyand veg vir jou denke, want hy weet: As hy jou kan laat twyfel oor wie jy is, sal hy jou laat twyfel oor Wie God is en wat Hy oor jou sê.

Daarom wil ons in hierdie reis nie net meer kennis opdoen nie. Ons wil God se waarheid so diep in ons harte vestig dat ons elke leuen van die vyand kan herken en verwerp.

Want wanneer jy weet aan Wie jy behoort en wie jy in Christus is, begin jy leef in die vryheid waarvoor Jesus reeds die prys betaal het. 

 

 

DAG 1 ♡ 

Jy is deur God geskape met ’n doel .

 

Liewe Vrou van God,

Jy is nie hier per ongeluk nie. Nog voordat jy jou eerste asem gehaal het, het God jou reeds geken. Hy het jou met liefde gevorm, jou uniek gemaak en ’n doel vir jou lewe bepaal.

Miskien vergelyk jy jouself met ander. Miskien voel jy nie mooi genoeg, slim genoeg of goed genoeg nie. Maar God maak nie foute nie. Elke deel van jou is met opset geskep.

Jou waarde lê nie in wat jy bereik, hoe mense jou sien of hoeveel jy doen nie. Jou waarde lê daarin dat jy deur God geskape is en dat Hy jou liefhet.

Wanneer jy begin glo wat God oor jou sê, verander alles. Jy hoef nie meer iemand anders te probeer wees nie. Jy mag rus in die waarheid dat jy presies die vrou is wat God geskep het om te wees.

 

 BYBELVERSE:

Psalm 139:14 (AFR20)

"Ek loof U omdat ek op ’n ontsagwekkende, wonderbaarlike wyse gemaak is. Wonderbaar is u werke, en dit weet ek alte goed."

 

Efesiërs 2:10 (AFR20)

"Ons is immers sy maaksel, g eskep in Christus Jesus om goeie werke te doen wat God vooraf voorberei het sodat ons daarvolgens kan leef."

 

Jeremia 29:11 (AFR20)

"Ek ken immers die planne wat Ek vir julle het, spreek die Here, planne van vrede en nie van onheil nie, om vir julle ’n hoopvolle toekoms te gee."

 

 SPREEK VANDAG OOR JOUSELF:

 ♡ Ek is wonderbaarlik deur God geskape.

♡ Ek het waarde omdat ek aan God behoort.

♡ God het ’n doel en plan vir my lewe.

♡ Ek hoef myself nie met ander te vergelyk nie.

♡ Ek is genoeg, omdat God my gemaak het.

 

 UITDAGING VIR VANDAG:

 Kyk vandag in die spieël en sê hardop:

  "Here, dankie dat U my met liefde geskape het. Ek kies om vandag te glo wat U oor my sê."

Skryf daarna drie eienskappe neer waarvoor jy God dankie sê dat Hy dit in jou geplaas het.

 

🤍 SELFREFLEKSIEVRAE:

 1. Glo ek werklik dat God my met ’n doel geskape het?

2. Watter leuens oor myself glo ek nog?

3. Hoe sal my lewe verander as ek elke dag vanuit God se waarheid leef?

 

 

 Dag 2

Jy is 'n geliefde kind van God✝️

 

Liewe Vrou van God,

Een van die grootste waarhede wat jy ooit in jou lewe kan ontdek, is dat jy nie net deur God geskape is nie – jy is ook Sy geliefde kind.

Voordat jy ooit iets kon doen om Sy liefde te verdien, het Hy jou reeds liefgehad. Voordat jy enige sukses behaal het of enige fout gemaak het, het Hy jou reeds gekies. Sy liefde vir jou hang nie af van hoe perfek jy is, hoeveel jy bereik of hoeveel keer jy struikel nie. Dit vloei uit Sy Vaderhart.

Baie vroue leef elke dag asof hulle God se aanvaarding moet verdien. Hulle probeer harder werk, beter wees en almal gelukkig hou, omdat hulle diep binne wonder of hulle ooit genoeg sal wees.

Maar God nooi jou vandag om op te hou probeer bewys dat jy genoeg is.

Jy is genoeg, nie omdat jy alles reg doen nie, maar omdat Jesus jou Syne gemaak het.

Wanneer 'n kind weet sy behoort, leef sy met vrymoedigheid. Sy hoef nie elke dag te wonder of sy welkom is nie. Sy weet sy het 'n plek. Net so wil God hê jy moet leef – met die sekerheid dat jy altyd welkom is in Sy teenwoordigheid.

Daar sal dae wees wanneer jy onseker voel. Dae wanneer jy aan jouself twyfel of wanneer mense jou teleurstel. Maar selfs dan verander God se liefde nie. Hy bly dieselfde. Hy bly jou Vader. Hy bly jou vashou.

Jy hoef nie vandag God se liefde te verdien nie. Rus net daarin.

Jy is nie 'n vreemdeling in Sy Koninkryk nie. Jy is nie net 'n dienaar nie.

Jy is Sy geliefde dogter.

En wanneer hierdie waarheid diep in jou hart wortel skiet, begin jy anders leef. Jy begin met meer vrede stap, met meer vrymoedigheid bid en met groter vertroue die vrou wees wat God jou geskape het om te wees.

Onthou vandag: Jy hoef nie eers iets te word voordat God jou liefhet nie.

Jy is reeds Sy geliefde kind. 🖤

 

Bybelverse:

1 Johannes 3:1 (AFR20)

"Kyk watter groot liefde die Vader aan ons bewys het: dat ons kinders van God genoem kan word, en ons is dit ook."

 

Romeine 8:15-16 (AFR20)

"Julle het immers nie 'n gees van slawerny ontvang om weer bang te wees nie, maar julle het die Gees ontvang wat julle as kinders van God aangeneem het. Deur Hom roep ons: 'Abba, Vader!' Die Gees self getuig saam met ons gees dat ons kinders van God is."

 

Galasiërs 3:26 (AFR20)

"Julle is immers almal deur die geloof kinders van God in Christus Jesus."

 

Spreek vandag oor jouself:

 🤍 Ek is 'n geliefde kind van God.

🤍 Ek behoort aan my Hemelse Vader.

🤍 Ek hoef nie God se liefde te verdien nie.

🤍 Ek is volledig aanvaar deur Jesus Christus.

🤍 My identiteit begin by wie se kind ek is.

 

 Uitdaging vir vandag:

 Vind vandag vir vyf minute 'n stil plek.

 Maak jou oë toe en sê stadig:

  "Vader, dankie dat ek aan U behoort. Help my om vandag deur U oë na myself te kyk."

 Skryf daarna drie maniere neer waarop jy die afgelope week God se liefde in jou lewe ervaar het.

 

 Selfrefleksievrae:

 1. Glo ek regtig dat God my onvoorwaardelik liefhet?

2. Watter dinge laat my soms twyfel aan my waarde as kind van God?

3. Hoe sal my lewe verander as ek elke dag leef met die sekerheid dat ek aan God behoort?

 

 Gebed:

 Liewe Vader,

Dankie dat ek U geliefde kind is. Dankie dat U my liefhet, nie oor wat ek doen nie, maar oor wie ek in U is. Help my om elke dag in hierdie waarheid te leef en nooit weer my identiteit in mense of omstandighede te soek nie. Laat my hart rus in U liefde en herinner my daagliks dat ek aan U behoort.

In Jesus se Naam. Amen. 

 

Dag 3

Jy is vrygemaak deur Jesus

Liewe Dogter van God,

Daar is baie vroue wat nog vandag gevange leef aan iets wat lank terug gebeur het. Miskien is dit 'n fout wat jy gemaak het, woorde wat oor jou uitgespreek is, of dinge wat aan jou gedoen is. Die vyand wil hê jy moet glo dat jou verlede jou identiteit is.

Maar Jesus sê iets anders.

Toe Jesus aan die kruis gesterf het, het Hy nie net vir jou sondes betaal nie—Hy het ook die kettings van skuld, skaamte en veroordeling verbreek. Jy hoef nie langer die gewig van gister saam met jou te dra nie.

God sien jou nie deur die lens van jou verlede nie. Hy sien jou deur die bloed van Jesus. Hy noem jou vergewe, herstel en vry.

Jy hoef nie eers perfek te wees voordat God jou kan gebruik nie. Hy gebruik mense wat bereid is om Hom te vertrou. Jou getuienis begin dikwels waar jou seerste wonde was.

Vandag nooi Jesus jou om daardie swaar las neer te sit. Laat los wat Hy reeds vergewe het. Kies om in die vryheid te leef waarvoor Hy reeds betaal het.

Jy is nie meer 'n gevangene van jou verlede nie. Jy is 'n vrou wat deur Jesus vrygemaak is. 🤍

Onthou vandag: Die vyand herinner jou aan jou verlede, maar God herinner jou aan jou identiteit. Kies om te glo wat God oor jou sê.

Bybelverse:

Romeine 8:38–39 (NLV)

 "Ek is daarvan oortuig dat niks ons van God se liefde kan skei nie... niks in die hele skepping sal ons kan skei van die liefde van God wat daar is in Christus Jesus ons Here nie."

 

1 Johannes 3:1 (NLV)

 "Kyk hoe groot is die liefde wat die Vader aan ons bewys het: Hy noem ons kinders van God, en ons ís dit."

 

 Spreek vandag hardop:

Vader, dankie dat ek U geliefde kind is. Ek hoef nie my waarde te bewys nie, want U het my reeds aanvaar. Vandag kies ek om my identiteit in U te vind en nie in my gevoelens of die wêreld se opinies nie. Ek behoort aan Jesus.

 

Uitdaging vir vandag:

Neem vandag 10 minute om stil te raak by die Here. Skryf drie dinge neer wat God volgens Sy Woord oor jou sê, en lees dit hardop. Laat Sy waarheid jou gedagtes vul.

 

🤍 Selfrefleksie-vrae:

 1. Waar soek ek nog my identiteit, buiten by God?

 2. Watter leuen oor myself moet ek vandag verruil vir God se waarheid?

 3. Hoe kan ek vandag leef as iemand wat weet sy is 'n geliefde kind van God?

 

Gebed:

Here Jesus, dankie dat ek aan U behoort. Help my om elke dag my identiteit in U te vind en nie in my omstandighede, prestasies of ander mense se opinies nie. Vul my hart met U waarheid en herinner my dat ek geliefd, gekies en waardevol is. Lei my vandag om soos U kind te leef.

In Jesus Amen. 🌸

 

Dag 4

Jy is nuut gemaak in Christus

Een van die grootste redes waarom soveel Christene sukkel om in vryheid te leef, is omdat hulle nog deur die bril van hulle verlede na hulself kyk.

Ons onthou die foute. Ons onthou die sonde. Ons onthou die seerkry. Ons onthou die dinge wat ander oor ons gesê het.

En stadig begin ons glo dat dit is wie ons is. En dan begin ons leuens oor onself glo. 

Maar God sê iets heeltemal anders.

Toe jy jou lewe aan Jesus gegee het, het Hy jou nie net vergewe nie—Hy het jou nuut gemaak.

Dit beteken nie jou verlede het nooit gebeur nie. Dit beteken jou verlede het nie meer die reg om jou identiteit te bepaal nie.

Die vyand wil jou voortdurend herinner aan wie jy was. Hy wil hê jy moet in skuld, skaamte en veroordeling bly leef, want hy weet iemand wat vasgevang is in sy verlede, sal sukkel om in God se roeping te stap.

Maar die Heilige Gees herinner jou aan iets baie groter: Jy is nie meer wie jy was nie. Jy is wie Christus sê jy is.

Wanneer God na jou kyk, sien Hy nie net jou mislukkings nie. Hy sien die geregtigheid van Jesus. Hy sien Sy geliefde dogter.

Daarom is jy nie veronderstel om elke dag jou verlede saam te dra nie.

Jy hoef nie aan te hou betaal vir sondes waarvoor Jesus reeds aan die kruis betaal het nie.

Jy mag jou verlede los.

Jy mag die skuld los.

Jy mag die skaamte los.

En jy mag elke dag opstaan as 'n nuwe skepping in Christus. Jy moet ... Dis al hoe jy in vryheid gan leef.

Want God is nie besig om 'n ou lewe reg te maak nie.

Hy is besig om 'n nuwe lewe in jou te openbaar.

"Daarom, as iemand in Christus is, is hy 'n nuwe skepping. Die ou dinge het verbygegaan; kyk, alles het nuut geword." — 2 Korintiërs 5:17

Jy is nie jou verlede nie. Jy is nie jou mislukkings nie. Jy is nie die vyand se leuens nie. Jy is 'n nuwe skepping in Christus Jesus.

 Bybelverse:

2 Korintiërs 5:17 (NLV)

"Iemand wat aan Christus behoort, is 'n nuwe mens. Die ou dinge is verby; kyk, alles het nuut geword."

 

Romeine 12:2 (NLV)

"Moenie aan hierdie wêreld gelykvormig word nie, maar laat God julle verander deur julle denke te vernuwe. Dan sal julle kan onderskei wat God se wil is—wat goed, aanvaarbaar en volmaak is."

 

Efesiërs 4:22–24 (NLV)

"Lê julle ou, sondige lewenswyse af... Laat God julle denke vernuwe en trek die nuwe mens aan wat volgens God se beeld geskape is in ware geregtigheid en heiligheid."

 

Spreek vandag oor jouself:

Ek is 'n nuwe skepping in Christus.

My verlede bepaal nie meer wie ek is nie.

Ek is vergewe, vrygemaak en nuut gemaak deur Jesus.

Ek kies om God se waarheid bo die vyand se leuens te glo.

Ek laat God se Woord my denke elke dag vernuwe.

Ek leef vanuit my identiteit as God se geliefde kind.

Ek behoort aan Jesus, en my lewe is veilig in Hom.

Vandag stap ek in die waarheid van wie God sê ek is. 

 

Vandag se uitdaging:

Skryf drie leuens neer wat jy soms oor jouself glo.

Soek vir elke leuen 'n Bybelvers wat God se waarheid daaroor verklaar. Lees daardie verse hardop vir jouself in die oggend en weer voor jy gaan slaap. Skryf dit neer en spreek daai verse daagliks hardop vir die volgende 4 weke. Maak dit deel van jou Bybel tyd.

 

 Selfrefleksie-vrae:

 1. Watter leuen oor my identiteit glo ek nog steeds?

 2. Watter waarheid uit God se Woord wil Hy hê moet vandag dieper in my hart wortelskiet?

 3. Hoe sal my lewe anders lyk as ek elke dag werklik glo wat God oor my sê? 

 

 

Dag 5 

Jy is toegerus en geroep 🛡

Het jy al ooit gevoel dat jy nie genoeg is nie? Dat ander meer talentvol, meer bekwaam of meer geskik is as jy?

Baie van ons voel soms so. Ons kyk na ander se gawes en vergeet dat God ook iets kosbaars in óns geplaas het.

Die waarheid is dat God jou nie per ongeluk geskep het nie. Hy het jou met 'n doel, unieke gawes en 'n spesiale roeping gemaak. Al voel jy soms klein, onseker of onbelangrik, sien God iets in jou wat jy dalk nog nie raaksien nie.

Ons vergelyk onsself so maklik met ander. Ons dink ons is nie slim genoeg, sterk genoeg of geestelik genoeg nie. Maar God vra nie dat jy iemand anders moet wees nie. Hy vra net dat jy getrou sal wees aan wie Hy jóú geskep het om te wees.

Die Here rus nie net mense toe wat reeds alles reg het nie. Hy rus gewone mense toe wat bereid is om Hom te vertrou. Moses het getwyfel. Gideon het bang gevoel. Ester het onseker gevoel. Tog het God elkeen gebruik om 'n groot verskil te maak.

Dalk voel die roeping wat God op jou lewe geplaas het groter as wat jy kan hanteer. Miskien maak dit jou selfs bang. Maar weet jy wat? Dit is dikwels juis 'n teken dat dit van God af kom. As jy dit maklik in jou eie krag kon doen, sou jy Hom nie nodig gehad het nie. God roep ons dikwels na plekke waar ons heeltemal op Hom moet vertrou. Waar jou eie vermoëns ophou, begin Sy krag werk. Hy roep jou nie omdat jy reeds alles het wat nodig is nie – Hy roep jou omdat Hý alles is wat jy nodig het.

Moenie wag totdat jy voel jy is "gereed" voordat jy begin leef waarvoor God jou geroep het nie. Hy is reeds besig om jou voor te berei. Elke ervaring, elke uitdaging en selfs elke moeilike seisoen vorm jou vir die doel wat Hy vir jou lewe het. Dis hoekom dinge nie maklik is nie. Jy kry ervaring wat ander mense se lewens gan verander. Ek se altyd, ervaring dra baie meer krag as kennis. Dis een ding om kennis oor iets te he en n heeltemal ander ding om ervaring te he. Mense luister baie meer eerder as hulle weet die persoon voor hulle was waar hulle is. 

Jou ervaring is jou Krag. Dit breek jou nie, dit lei jou in jou roeping. Niemant het die pad geloop wat jy het nie. Niemant kan doen waarvoor jy geroep is nie. 

Moenie jou lig wegsteek nie. Daar is mense wat hoop nodig het, liefde nodig het en Jesus nodig het – en God wil jou gebruik om Sy lig na hulle te bring. Die wêreld het nie nog iemand nodig wat probeer wees soos almal anders nie. Dit het jou nodig – presies soos God jou geskep het. 

Onthou vandag: Jy is nie net gered nie; jy is ook geroep. God het jou toegerus met alles wat jy nodig het om die doel uit te leef waarvoor Hy jou geskep het. 🤍

Bybelverse: (NLV)

2 Timoteus 1:9

"Hy het ons gered en ons geroep om aan Hom toegewy te leef. Nie omdat ons dit verdien het nie, maar omdat dit Sy plan en genade was."

Efesiërs 2:10

"Ons is God se meesterstuk. Hy het ons in Christus Jesus geskep om die goeie dinge te doen wat Hy lankal vir ons beplan het."

1 Petrus 4:10

"God het aan elkeen van julle 'n genadegawe gegee. Gebruik dit om mekaar te dien as goeie bestuurders van God se veelvuldige genade."

 

Spreek vandag oor jouself:

Ek is deur God geroep met 'n doel.

God het my toegerus met alles wat ek nodig het om Sy wil te doen.

Ek hoef nie op my eie krag staat te maak nie, want God gee my die krag, wysheid en moed wat ek nodig het.

Ek sal nie toelaat dat vrees my terughou van dit waarvoor God my geroep het nie.

Ek kies om vandag in geloof te stap en my lig helder te laat skyn.

 

Vandag se uitdaging:

Bid vandag en vra die Here om weer Sy doel vir jou lewe aan jou hart te bevestig.

Skryf drie gawes of sterk punte neer wat God vir jou gegee het, en kies een praktiese manier waarop jy vandag iemand daarmee kan dien of bemoedig.

Wanneer vrees of twyfel opkom, herinner jouself daaraan: God roep nie die bekwaamstes nie – Hy bekwaam dié wat Hy roep.

 

Selfrefleksievrae:

Is daar iets waarvoor God my roep, maar wat ek uit vrees vermy?

Watter gawes of talente het God in my lewe geplaas wat ek dalk onderskat?

Hoe kan ek hierdie week meer doelbewus leef volgens die roeping wat God oor my lewe het? 

 

Dag 6

Jy is nooit alleen nie

Kosbare Vrou van God! 

Vandag wil ek jou herinner aan 'n waarheid wat jou hart met vrede kan vul: Jy is nooit alleen nie.

Ons almal beleef tye waar ons onseker voel, moeilike besluite moet neem of deur uitdagings gaan wat niemand anders regtig verstaan nie. Dit is maklik om te voel asof jy alles alleen moet dra. Maar dit is nie hoe God bedoel het jy moet leef nie.

Toe Jesus na die Vader teruggekeer het, het Hy Sy kinders nie alleen agtergelaat nie. Hy het die Heilige Gees gestuur om vir altyd by ons te wees. Die Heilige Gees is nie net iemand wat ons af en toe besoek nie – Hy woon in elke gelowige. Hy is ons Trooster wanneer ons moedeloos is, ons Helper wanneer ons swak voel en ons Leidsman wanneer ons nie weet watter rigting om te kies nie.

Dit beteken jy hoef nie elke probleem in jou eie krag op te los nie. Jy hoef nie al die antwoorde te hê voordat jy die volgende stap neem nie. God stap reeds saam met jou. Hy sien wat voorlê, Hy ken jou hart en Hy belowe om jou nooit te verlaat nie.

Miskien voel jy vandag oorweldig deur verantwoordelikhede, of dalk wag daar iets voor waarvoor jy bang is. Onthou dan dat dieselfde Gees wat Jesus uit die dood opgewek het, ook in jou woon. Hy gee jou die krag om aan te hou, die wysheid om reg te kies en die vrede wat alle verstand te bowe gaan.

Ek wil jou vandag aanmoedig om nie net met God te praat wanneer dinge verkeerd loop nie, maar om Hom doelbewus deur jou hele dag te betrek. Nooi die Heilige Gees in jou gesprekke, jou besluite, jou werk, jou gesin en selfs die klein oomblikke van jou dag. Jy sal verbaas wees hoe getrou Hy jou lei wanneer jy jou hart oopmaak vir Sy stem.

Stap vandag met vrymoedigheid. Nie omdat jy sterk genoeg is nie, maar omdat God by jou is. Jy is nooit alleen nie, en jy sal ook nooit alleen hoef te wees nie. 

 Bybelverse:

Johannes 14:16-17 (NLV)

 "Ek sal die Vader vra, en Hy sal vir julle 'n ander Helper gee wat vir altyd by julle sal wees... Hy bly by julle en sal in julle wees."

 

Romeine 8:38-39 (NLV)

"Ek is oortuig dat niks ons sal kan skei van die liefde van God wat daar is in Christus Jesus ons Here nie."

 

Jesaja 41:10 (NLV)

 "Moenie bang wees nie, want Ek is by jou. Moenie bekommerd wees nie, want Ek is jou God. Ek versterk jou, Ek help jou en Ek hou jou vas met My oorwinnende regterhand."

 

Hebreërs 13:5 (NLV)

 "Ek sal jou nooit begewe en jou nooit verlaat nie."

 

Spreek vandag oor jouself:

 Ek is nooit alleen nie. God is altyd by my en Sy Heilige Gees woon in my. Ek hoef nie uit my eie krag te leef nie, want God gee my wysheid, vrede en krag. Ek vertrou Hom met elke besluit en elke nuwe dag. Ek stap met vrymoedigheid vorentoe, want die Here verlaat my nooit.

 

Vandag se uitdaging:

Raak vandag doelbewus bewus van God se teenwoordigheid.

 Voordat jy 'n besluit neem, begin 'n taak of deur 'n moeilike oomblik gaan, stop vir 'n paar sekondes en sê:

"Heilige Gees, lei my. Ek kies om vandag saam met U te stap."

Skryf vanaand neer waar jy God se leiding, vrede of teenwoordigheid vandag raakgesien het.

 

Selfrefleksievrae:

1. Wanneer voel ek die meeste alleen of oorweldig?

 2. Is daar 'n area van my lewe waar ek probeer alles in my eie krag doen?

 3. Hoe kan ek die Heilige Gees meer doelbewus by my daaglikse lewe betrek?

 4. Watter waarheid uit vandag se boodskap wil ek hierdie week vasgryp?

 

Gebed:

Vader God,

Dankie dat U my nooit alleen laat nie. Dankie dat U die Heilige Gees gegee het om my Trooster, Helper en Leidsman te wees. Help my om elke dag bewus te leef van U teenwoordigheid en om nie op my eie krag staat te maak nie.

Wanneer ek onseker, bang of moeg voel, herinner my daaraan dat U saam met my stap. Gee my wysheid vir elke besluit, vrede vir elke storm en moed om U te vertrou, selfs wanneer ek nie die pad voor my kan sien nie.

Ek kies vandag om my hand in Une te sit en saam met U te wandel.

In Jesus se Naam. Amen. 🌸

Dag 7

Leef elke dag vanuit jou identiteit in Jesus

 

Kosbare Vrou van God,

Ons het saam op 'n besonderse reis gestap. Vir sewe dae het ons teruggekeer na God se waarheid oor wie jy werklik is. Nie wat die wêreld sê nie. Nie wat jou verlede sê nie. Maar wat jou Hemelse Vader oor jou verklaar.

Vandag eindig die reeks, maar jou reis saam met Jesus gaan voort.

Jou identiteit is nie iets waarna jy nog moet soek nie – dit is iets wat jy elke dag mag uitleef. Omdat jy aan Jesus behoort, kan jy met vrymoedigheid leef. Nie omdat jy altyd sterk voel of alles reg doen nie, maar omdat Hy in jou leef.

Daar sal steeds dae wees wanneer twyfel, vrees of leuens aan jou deur klop. Maar nou weet jy waarheen om terug te gaan. Terug na God se Woord. Terug na Sy waarheid. Terug na die kruis waar Jesus reeds bepaal het wie jy is.

Moenie toelaat dat jou omstandighede jou identiteit bepaal nie. Laat God se waarheid jou gedagtes, jou woorde en jou lewe vorm.

Stap elke nuwe dag met die wete: Jy is geliefd. Jy is vergewe. Jy is nuut gemaak. Jy is toegerus. Jy is nooit alleen nie.

En bo alles...

Jy is Syne.

Mag hierdie nie die einde van jou reis wees nie, maar die begin van 'n lewe waarin jy elke dag leef vanuit jou identiteit in Jesus.

Hy het 'n goeie werk in jou begin, en Hy sal dit voltooi.

Hou aan om Hom te volg. Hou aan om Sy Woord te lees. Hou aan om te glo wat Hy oor jou sê. Al tref die wêreld se omstandighede. Onthou om te weet wat jou identiteit in Christus is keer nie die wêreld se uitdaging en storms nie mar dit verander alles in hoe ons teenoor dit optree en daaroor dink. 

Want wanneer jy ontdek wie jy in Christus is, verander alles. 

Bybelverse:

Galasiërs 2:20 (NLV)

"Ek is saam met Christus gekruisig. Dit is nie meer ek wat leef nie, maar Christus leef in my. Die lewe wat ek nou leef, leef ek deur geloof in die Seun van God wat my liefgehad en Homself vir my oorgegee het."

 

Kolossense 2:6-7 (NLV)

 "Net soos julle Christus Jesus as Here aangeneem het, moet julle nou ook in Hom leef. Julle moet diep in Hom gewortel wees, op Hom gebou word en sterk staan in die geloof."

 

Efesiërs 2:10 (NLV)

"Ons is God se meesterstuk. Hy het ons in Christus Jesus geskape om die goeie werke te doen wat Hy lank tevore vir ons bestem het."

 

Filippense 1:6 (NLV)

"Ek is oortuig daarvan dat God, wat die goeie werk in julle begin het, dit sal voltooi tot op die dag wanneer Christus Jesus weer kom."

 

Spreek vandag oor jouself:

Ek behoort aan Jesus. My identiteit is vas in Hom. Ek leef nie vanuit my verlede nie, maar vanuit God se waarheid. Ek is geroep, toegerus en geliefd. Ek kies om elke dag te leef soos die vrou wat God my geskape het om te wees. Christus leef in my, en daarom stap ek met geloof, vrede en vrymoedigheid.

 

Vandag se uitdaging:

Neem vandag 'n paar minute en skryf neer:

"Wie sê God ek is?"

Maak 'n lys van die waarhede wat jy hierdie week ontdek het en bêre dit waar jy dit gereeld kan lees. Wanneer twyfel kom, kies om God se waarheid hardop oor jouself te spreek.

 

Selfrefleksievrae:

 1. Watter waarheid oor my identiteit het hierdie week my die meeste aangeraak?

2. Watter leuen oor myself moet ek vandag finaal laat gaan?

3. Hoe kan ek elke dag doelbewus vanuit my identiteit in Jesus leef?

4. Wat wil ek aanhou doen om geestelik te groei en nader aan Jesus te leef?

 

🌸 Onthou: Hierdie is nie die einde van jou reis nie—dit is die begin van 'n lewe waarin jy elke dag wandel in die waarheid van wie jy in Christus is. Hy gaan saam met jou, elke tree van die pad. 

 

Vrou van God, ek wil jou aanmoedig:

• Maak elke dag tyd saam met Jesus.

• Spreek Sy beloftes gereeld hardop oor jouself.

• Soek Sy wil in alles wat jy doen.

• Luister na die stem van die Heilige Gees en wees gehoorsaam wanneer Hy jou lei.

• Lees en bestudeer God se Woord gereeld.

• Vertrou God se tydsberekening, selfs wanneer jy dit nie verstaan nie.

• Leef elke dag vanuit jou identiteit in Jesus en nie vanuit jou gevoelens of omstandighede nie.

• Hou aan om te groei in jou verhouding met Hom.

• Onthou: Jou storie en jou ervaring kan die hoop wees waarvoor iemand anders vandag bid.

• Onthou altyd: Jy is geliefd, jy is waardevol, jy is geroep... en jy is Syne.

Mag hierdie 7 dae nie die einde van jou reis wees nie, maar die begin van 'n lewe waarin jy elke dag nader aan Jesus leef, Hom meer leer ken en met vrymoedigheid wandel in die waarheid van wie jy in Christus is. 

 

 

               Vrouwees in geloof 

   Geskryf duer: Jeanine Van der Berg