8 futbol zelai adinako espazioa libre geratu da Durango erdigunean. Hainbat urte pasatu dira gure herria bi zatitan banatzen zuen trenbidea lurperatu zenetik, eta horrek hainbat lursail libre utzi zituen. Hasierako plana 18 pisutako bost dorre eraikitzea zen, baina, orain dela bi urte, durangarrok argi utzi genuen proiektu hori ez zela gure herriak behar zuena, lursail horien etorkizuna erabakitzeko Herri Galdeketa bat beharrezkoa zela argudiatuz.

Datorren Martxoaren 14an egingo da galdeketa, eta galdera hau izango da: “Ados al zaude PERI 1 TRENBIDEA proiektua bertan behera uzteaz eta prozesu parte-hartzaile bat izango duen alternatiba bideragarri baten azterketa martxan jartzearekin?”.

Manifestu hau sinatzen dugun gazteok galdeketan parte hartzea oso garrantzitsua dela uste dugu, gure eta gure herriren etorkizuna baldintzatuko duelako, eta BAI bozkatzearen alde egiten dugu ondorengo arrazoiengatik:

• Gazteontzako espazio falta nabaria dago Durangon: berdeguneak, aisialdirako, kirolerako edota kultur ekipamenduetarako. Horregatik lursail horiek ezin dira zementuz eta etxez soilik bete. Hala, pertsonen ongizatean oinarritutako hirigintza ardatz izanda, dorreak baztertu eta etorkizunean gure beharrei erantzungo dien proiektu bat egin behar dela uste dugu.

• Egungo krisi sozio-ekologikoaren aurrean erresilientzia sustatzea premiazkoa dela uste dugu. Dorreen proiektuak, ordea, kutsadura bisualaz gain, trafikoaren hazkunde handia eragingo du Durango erdialdean, airearen kutsadura handituz. Beste aldetik, porlanean oinarritutako proiektu bat gauzatuz gero, gure herriak arnasgune bat eraikitzeko aukera paregabea galduko lukeela uste dugu. Horregatik, ingurumena, eta beraz, pertsonen osasuna errespetatuko duen proiektu baten alde egiten dugu.

• Durangoko gazteak gara etorkizunean herri honetan biziko garenak, eta gure iritziak asko balio duela uste dugu. Beharrezkoa ikusten dugu gazteok herriko erabakietan parte hartzea. Horregatik BAI bozkatu eta ondoren irekiko den prozesu parte-hartzailean kontuan hartuak izatea eskatzen dugu.

Horregatik eta beste hainbat arrazoirengatik, manifestu hau sinatu eta zabaltzera animatzen zaitugu. Ilun ikusten dugu gazteok etorkizuna eta ezin dugu aukera hau galdu.

Martxoaren 14an BAI!